ऑफिस सुटण्यापूर्वी

————————————-
(दिवसाची सर्व कामे संपवल्यावर संध्याकाळी ऑफिस मध्ये आवराआवर करतानाचा तो मूड..त्यात आहे – घरी जाण्याची घाई, काही कामाचा उरक, आणि शेवटी टिफिन बॉक्स बरोबर येणारी ‘तिची’ आठवण, या सगळ्याचं टिपण बनतं ते मग असं…)

—>

कामे संपवता संपवता, उरली थोडी कसकस

कागदपत्रांच्या ओळी मात्र शिस्तीत, नीटस

.

कामे संपवता संपवता शहारली बोटे थोडी,

सुन्न मेंदूच्या डोक्यात, वाटा काही नागमोडी

.

कामे संपवता संपवता, राहिलं इथे तिथे काही

मनाच्या त्या राखणीला, कोण आलं कोण नाही

.

कामे संपवता संपवता, रात्र चढतच चालली

शून्ये चंद्राच्या आकड्यावरची पुन्हा मोजून पाहिली

.

कामे संपवता संपवता, भेटे सखा आता कोण

उरे रस्त्याच्या वाटेला सरळ रेषांचा त्रिकोण

.

कामे संपवता संपवता डोळे हे का चुरचुरले

कडी वाजत्या डब्यातून, पहा चांदणे भुरभुरले…